Mesfushori francez Tiemoué Bakayoko ka një kontratë me skuadrën e Chelsea, por luan në formë huazimi me Milanin. Të dyja skuadrat kërkojnë ta kenë në radhët e tyre 24-vjeçarin, që ka thënë se për sezonin e ardhshëm e ka bërë zgjedhjen e tij.
“Kam një kontratë me Chelsea, kjo është e vërtetë. Por ndihem mirë te Milani dhe preferoj që të vazhdoj të luaj këtu edhe sezonin tjetër. Kush shprehet se Milani nuk është më një ekip i madh, si dikur, gabon”, u shpreh Bakayoko.
Më tej, francezi shton: “Mjafton të shihni historinë e Milanit për të kuptuar se unë jam në një ekip të madh. Kur mbërrita në Milanello u mahnita nga historia e kuqezinjve, fotografitë dhe trofetë. Ndaj dua të qëndroj këtu”, tha Bakayoko.
Pritet që kuqezinjtë të paguajnë klauzolën (40 milionë euro) për të blerë 100% kartonin e lojtarit. Në këtë transferim mund të hyjë edhe Kessie, që mund të udhëtojë në kah të kundërt, duke kaluar të blutë e Londrës sezonin e ardhshëm.