Paris Saint-Germain e ka pasur shumë të vështirë ndeshjen e javës së 23-të të Ligue 1 ndaj St Etienne, por në fund ka fituar.
Sfida ndaj vendit të 5-të në renditje pritej të ishte e vështirë për kampionët në fuqi, por në fund ishte magjia e Kylian Mbappe ajo që i ka dhënë fitoren 1-0 Parisit.
Pas ndeshjes së mesjavës ndaj Manchester United në Champions League, PSG është rikthyer në fushë me një skemë 3-5-2, ku Di Maria ka luajtur si sulmues, ndërsa Dani Alves dhe Bernat si mesfushorë.
Një tjetër vendosje e bukur e trajnerit Thomas Tuchel, i cili po ia del mbanë të fitojë pa u ndjerë mungesa e Neymar dhe Cavani.
Goli i Mbappe ka ardhur në fund të takimit. Ai është francezi i parë që shënon 19 gola në 18 ndeshjet e para të sezonit në Ligue 1, diçka që kishte 40 vite që nuk ndodhte.