Inter duhet të kthehet menjëherë te fitorja. Dy humbjet radhazi të pësuara në kampionat kanë vënë në diskutim edhe kualifikimin në edicionin e ardhshëm të Champions League.
Skuadra e Luciano Spallettit nuk mund të gabojë kundër Parma-s dhe trajneri italian po punon këto ditë për të hedhur në fushë një ekip që do të mund të sigurojë tri pikët.
Mësohet se tekniku i milanezëve ka disa dyshime në lidhje me formacionin. I pari ka të bëjë me krahun e djathtë të mbrojtjes, ku D’Ambrosio duket se ka një avantazh të lehtë ndaj blerjes së re Cedric.
Pjesa tjetër e mbrojtjes që do të pozicionohet para Handanovic duhet të përbëhet nga Asamoah, gati për t’u kthyer në krahun e majtë pasi i la vendin Dalbert kundër Bolognas, dhe nga DeVrij-Skriniar në qendër.
I vetmi emër i sigurt në treshen e mesfushës është ai i Brozovic, në krah të të cilit mund të aktivizohen Joao Mario dhe Nainggolan. Për sa i takon sulmit, ka shumë mundësi që të rikuperohet Keita.
Duke marrë parasysh skualifikimin e Politanos, në krah të Icardit, emri i dytë i sigurt për trajnerin, duhet të luajnë Candreva dhe Perisic.
