Aventura e vërtetë e Kristiano Ronaldos në Serinë A nisi në javën e katërt, pikërisht kundër Sasuolos, sepse kundër jeshilzinjve erdhi edhe goli i parë, më saktë dy golat e parë, duke qenë se fitorja 2-1 në Torino në fazën e parë u vulos pikërisht nga portugezi. Dhe sot, CR7 do të gjejë përballë sërish skuadrën që e zhbllokoi, me shpresën se kundër tyre do të ketë sërish mundësinë të festojë dhe të kthejë Juven te fitorja.
Por gjatë kësaj periudhe, nga Sasuolo deri te Sasulo, shifrat e vendosura nga 34-vjeçari listohen më poshtë:
“CR17” – Pas 22 javësh kampionat, Ronaldo ka ditur që të marrë kryesimin e golashënuesve të Serisë A me 17 gola, lë pas Kualiarelën me 16.
ASISTET – Rendimenti pozitiv i Ronaldos në Itali nuk tregohet vetëm nga golat, por edhe nga asistet që ka ofruar për shokët e skuadrës. Shifrat momentale flasin për 6 pasime për gol, ku më decizivët ishin ata të dy të ofruar në përmbysjen kundër Napolit, në fazën e parë.
MESATARJA E GOLAVE – Sulmuesi luzitan i Juventusit ka një mesatare shënimi prej një goli çdo 112 minuta: për 17 golat e shënuar i janë dashur pak më shumë se 1900 minuta.
I PALODHSHËM – Alegri nuk ka hequr praktikisht kurrë dorë prej tij, pasi Ronaldo ka luajtur 21 nga 22 ndeshje si titullar (me Atalantën zbriti në fushë në minutën e 65-të dhe shënoi golin e barazimit). Dhe të vetmin zëvendësim e ka marrë në Firence, pas 79 minutash lojë.
GODITJE STANDARDE – Ronaldo ka shënuar me të majtën, me të djathtë, me kokë dhe me penallti, por i mungon goli me goditje dënimi. Nga pika e bardhë numëron 5 gjuajtje të sakta në rrjetë (Empoli, Fiorentina, Torino, Sampdoria e Lacio), por ka gabuar kundër Kievos (pritje e Sorrentinos).
