Sulmuesi francez Olivier Giroud ka deklaruar sot se është i gatshëm të rikthehet në vendlindjen e tij në mënyrë që të luajë sa më shumë. “Dua të bëhem sërish një futbollist i rëndësishëm”, tha sulmuesi 32-vjeçar, kampion bote me Francën. Ai nuk aktivizohet shumë me Chelsea, që kur në krye të ekipit ka ardhur trajneri Maurizio Sarri, që preferon argjentinas Gonzalo Higuain.
Skuadra e Lyon ka shfaqur interes për Giroud, ndaj sulmuesi është gati të rikthehet në Ligue 1. “Unë nuk e di të ardhmen time, por jam gati për t’u rikthyer sërish në Francë. Jam gati të bisedoj me këdo që është i interesuar për mua. Gjithsesi, për momentin jam fokusuar te Chelsea dhe ta mbyllim sezonin me trofeun e Europa League dhe vendin e katërt në Premier”, tha Giroud.
Giroud ndodhet në Premier League që prej vitit 2012, kur u transferua tek Arsenali, por që prej janarit 2018 luan me Chelsea. “Më bëhet qejfi që dikush nga Franca më ka kërkuar. Lyon është një ekip i mirë, me mjaft lojtarë të rinj. Unë i di aftësitë e mia, nuk jam një lojtar stoli, pasi sa herë që luaj jap më të mirën dhe arrij të shënoj shpesh”, u shpreh Olivier Giroud.
