Tre gola për Gonzalo Higuain tek Chelsea, një skuadër që njeh krizë rezultatesh prej kohësh. Ardhja e argjentinasit në Londër nuk e ka zgjidhur problemin e trajnerit Sarri, i cili në fund të sezonit shikohet si i larguar nga “blutë”.
U largua mes të gjithë tensionit dhe hatërmbetjes nga Milan, me shpresën që do rikthehet ai Higuaini i dikurshëm me fanellën e Chelsea, por nuk po ndodh kështu. Gjatë këtij sezoni ka shënuar 11 gola në total, duke përfshirë eksperiencën e tij në Serie A dhe Premier League, shifra goxha të ulëta për 31-vjeçarin.
Chelsea ka të drejtë ta blejë për 36 milionë euro Higuainin, ose mund ta mbajë deri në verën e vitit 2020 për 18 milionë euro të tjera.
Gjithsesi e ardhmja e tij në Londër varet nga e ardhmja e Sarrit te Chelsea. Me situatën aktuale të krijuar, italiani duket se nuk do vijojë të jetë aty nga fundi i këtij sezoni, për faktin se ai e ka humbur fuqinë në dhomat e zhveshjes dhe drejtuesit nuk janë më të bindur nga projekti i tij.
Largimi i Sarrit do të ishte një udhëkryq për argjentinasin, që me të gjitha gjasat do të kthehet te Juventus nga klubi anglez. Në Torino i kanë idetë e qarta, Higuain do të nxirret direkt në merkato nëse Chelsea nuk e mban.
