Trajneri i Skënderbeut, Orges Shehi, foli pas humbjes minimale ndaj Laçit, duke u shprehur:
“Na vjen keq për humbjen. I thashë çunave në dhomat e zhveshjes, që nuk më vjen keq për mënyrën si e kërkuam fitoren dhe për lojën që zhvilluan. Këtë ndeshje mund të humbësh 1 në 30. Sigurisht që na dhemb, po nuk kemi kohë të qajmë, sepse ndeshje tjetër vjen shpejt. Shpresoj ta kemi fatin në ndeshjet e radhës. Duhet të shohim përpara. Bregu nuk është as i pari as i fundit që humbet penallti.”
Cinizmi përpara portës…
Ndeshjet fitohen duke qenë cinik, duke pasur fat, duke pasur kundërshtar të dobët. Për deri sa portieri kundërshtar ishte më i miri i ndeshjes, do të thotë se kemi bërë mirë. Nuk jam i mërzitur për humbjen, në qoftë se luajmë kështu.
Goli i pësuar…
Ka qenë një rast që është gjynah ta pësosh. Kam bërtitur nga stoli, kujdes autin e gjatë. Nuk jemi aq vigjilentë. Ka momente që nuk e kuptojmë që një episod ndryshon komplet lojën.
Kaq i brishtë është Skënderbeu i këtij sezoni?
Që të krahasosh këtë Skënderbeu me atë të kaluarin është e çuditshme. Nuk jemi ai Skënderbeu. Vitet e kaluara kishim individë që e zgjidhnim ndeshjen. Ne erdhën për të luajtur futboll, për vazhdimësi. Nuk kemi çfarë të bëjmë. Nuk kemi lojtarë që e marrin përsipër skuadrën. Po nuk luajtëm të gjithë bashkë, nuk kemi gjë në vijë. Duke pasur shumë lojtarë të rinj dhe fatin kundërt, kjo gjë na i bën më të vështirë misionin.