Tripleta: Champions, Kupë dhe kampionat, nuk është e vetmja që ekziston në futboll. Në Angli është një tjetër, e cila nuk është fituar kurrë më parë nga asnjë skuadër dhe Mançester Siti ka shansin që të futet në histori. Bëhet fjalë për fitoren e titullit kampion të Kupës së Anglisë dhe të Kupës së Ligës. Ferguson e ka konsideruar një mision të pamundur dhe vetë me Mançester Junajtid dështoi ta fitonte, pavarësisht se iu afrua 2 herë.
“Është një tripletë që nuk do të realizohet kurrë. Duket shumë e vështirë sepse skuadrat janë të motivuara dhe duan të fitojnë”, ka thënë Ferguson pas humbjes së një finaleje. Sot do të shikojë duelin mes Uotfordit dhe Sitit. Nëse fitojnë këta të fundit, atëherë tripleta e pamundur do të bëhet realitet. Nëse ndodh e kundërta, atëherë Fergi do të ketë të drejtë.
