Interi siguroi mes vuajtjesh dhe vetëm në “frymën e fundit”, pjesëmarrjen në edicionin e ardhshëm të Ligës së Kampionëve, ndërsa tashmë drejtuesit mund të nisin punën për sezonin e ri.
Mediat në Itali e japin të kryer tashmë largimin e Spallettit, ndërsa vetë ky i fundit iu përgjigj një pyetjeje mbi të ardhmen, në përfundim të takimit ndaj Empolit.
“Duhet të mësojmë nga Agnelli, i cili pas ndeshjes me Ajaxin konfirmoi Allegrin, por më pas e patë çfarë ndodhi. Nuk e di a do largohem, por nëse qëndroj, kjo po që do të ishte surprizuese për mua”, tha Spalletti, duke lënë të kuptohet se i ka valixhet gati tashmë.
Megjithatë tekniku zikaltër pranoi se ende nuk ka marrë asnjë komunikim nga shoqëria për këtë çështje dhe se në ditët e ardhshme pritet të sqarohen pozitat e tij tek Interi.
