Talenti i Borussia Dortmundit, Dario Scuderi, ka vendosur të largohet nga futbolli në moshën 21-vjeçare.
Tre vjet më parë Scuderi pësoi një nga lëndimet më të këqija në historinë e futbollit në një ndeshje të UEFA Youth League kundër Legia Warshavës dhe dukej sikur karriera e tij kishte përfunduar para kohe.
Pas një rruge të gjatë për t’u rikuperuar, që përfshiu nëntë operacione dhe gati 700 ditë në spital, Scuderi më në fund ktheu ndjenjën e të qenit futbollist përsëri dhe u rikthye në fushë në ngjyrat e Dortmundit përsëri në gusht 2018.
Por pavarësisht rikuperimit të tij të mrekullueshëm, Scuderi është dashur të braktisë ëndrrën e tij për të qenë një futbollist profesionist.
Për të shmangur një tjetër dëmtim fatal kirurgu i Scuderit, profesor Michael Strobel, i komunikoi lajmin pacientit të tij që nuk do të luante më kurrë futboll.
“Është dëmtimi më i keq që mund të imagjinoni”, tha Strobel.
“Pjesërisht të gjitha janë të shqyera: ligamentet, të gjithë muskujt dhe shkëputje të muskujve nga kocka”, tha mjeku.
