Edhe pse thjesht një miqësore, skandali i racizmit ka përfshirë ndeshjen e pak ditëve më parë, mes ekipit gjerman të Bundesliga 2, Vfl Bohum, që luante ndaj zviceranëve të St Galen.
Ishte mbrojtësi me origjinë angleze, 20-vjeçari Xhordi Osei-Tutu, që aktivizohet tek Bohum, i cili pas disa ofendimeve raciste gjatë miqësores, nuk duroi më. Kur shënonte minuta e 42-të, dhe pasi i tregoi arbitrit për thirrjet e tifozëve të pranishëm, ai zgjodhi të largohej nga fusha në formë proteste, madje edhe me lot në sy.
Klubi zviceran u shpreh se ka nisur një hetim për tifozët e vet, për këto thirrje, por mohuan se lojtarët e tyre në fushë të kenë thënë diçka të pahijshme. Pamjet e lojtarit që dilte me lot në sy nga fusha e lojës, bënë xhiron e të gjitha mediave, duke kujtuar sërish se racizmi është një problematikë shumë e mprehtë në futboll.