Mario Baloteli duket se ka mbyllur të gjitha mundësitë për t’u rikthyer te Marseja, Sulmuesi në sezonin e kaluar arriti të linte shenjën e tij me gola, duke kujtuar Balotelin e kohëve të ara. Megjithatë, kontrata e tij me skuadrën e kampionatit francez ka përfunduar dhe lojtari është i lirë të zgjedhë alternativën më të përshtatshme duke qenë se Marseja nuk ka dhënë sinjale për rinovimin.
Kështu, për 28-vjeçarin është përfolur shpesh një rikthim në kampionatin italian, aty ku më parë është aktivizuar me Interin dhe Milanin. Emri i tij është përmendur si një përforcim i mundshëm i Parmës apo Breshias, por të tilla klube e kanë të vështirë të përballojnë rrogën e sulmuesit. Ndërkohë, tashmë një mundësi e re është shfaqur për futbollistin. Bëhet fjalë për Fiorentinën.
Presidenti i ri i klubit vjollcë kërkon t’i bëjë një dhuratë tifozerisë së tij, ndërsa Baloteli do të ishte një surprizë e bukur. Për momentin, asgjë konkrete, megjithatë ndjesia është se sulmuesi kërkon të rikthehet në Itali dhe se Fiorentina mund të përballojë shpenzimet e Marios.
