Philippe Menasché konsiderohet një nga pionierët e kërkimeve mbi qelizat staminale. Kardiokirurgu i spitalit Pompidou në Paris ka dhënë një intervistë për të përditshmen italiane ‘La Repubblica’ në të cilën iu përgjigjet zërave për kurat që po iu nënshtrohet pacienti i tij, ish-kampioni i botës në Formula 1, Michael Schumacher.
Schumacher nuk është shfaqur në publik që nga incidenti i 29 dhjetorit 2013, kur bënte ski në Meribel.
Nga ai moment nuk është dhënë praktikisht asnjë lajm për gjendjen e tij shëndetësore. Komunikimi i fundit ishte më 3 janar nga gruaja e tij Corinna, në Facebook, për 50-vjetorin e lindjes së ish-pilotit.
Sipas disa zërave të dalë në rrjetet sociale, ish-piloti gjerman iu ishte nënshtruar disa terapive me përbërje qelizash staminale të përgatitura nga Philippe Menasché. Doktori 69-vjeçar zbulon të vërtetën:
‘Nuk jam kompetent për mrekullitë. Nuk po bëjmë asnjë eksperiment, term që nuk i përket vizionit serioz të mjekësisë’.
Mjeku konfirmon se ka qenë i pari që ka bërë transplant të qelizave staminale në zemër, por nënvizon se cikli i testeve klinike është mbyllur më 2017.
Menasche thotë se ka marrë shumë mesazhe nga jashtë, si dhe nga Italia, nga persona të interesuar për kurën e shtatë herë kampionit të botës në Formula 1.
‘Pati një shpërthim vëmendjeje karshi repartit tonë, por situata tashmë është normalizuar’.