Përballja ndaj kampionëve të botës nisi me një incident për skuadrën tonë. Organizatorët dhe drejtuesit e stadiumit “Stade de France” ngatërruan himnin teksa u ekzekutua një i gabuar dhe jo ai shqiptar.
U desh këmbëngulja e stafit të ekipit tonë përfaqësues dhe të vetë futbollistëve që të mos niste ndeshja pa u ekzekutuar më parë himni dhe pa pasur një ndjesë publike. Lorik Cana e ka denoncuar mungesën e respektit nga vendësit. Ish-kapiteni i Kombëtares shqiptare ka folur për mediat franceze pas ndeshjes së luajtur të shtunën në Paris.
“Unë nuk jam as i shokuar dhe as nuk mbaj mëri. Termi i saktë që unë gjej për të përshkruar këtë situatë është thjesht mungesë respekti. Kaq mund të them”, komentoi Cana për skandalin me himnin para ndeshjes.
Ish-kapiteni kuqezi njihet mirë në Francë, për vetë faktin se ka luajtur në dy klubet legjendare të këtij vendi: PSG dhe Olimpik i Marsejës. Madje, për disa vite ka mbajtur edhe shiritin e kapitenit të skuadrës marsejeze. Në Shqipëri – Francë në Europianin e 2016-ës Cana mungoi për shkak kartonësh.
