Skënderbeu po përgatit në thellësi ndeshjen anti-Tiranë. Në seancën e fundit të zhvilluar pasditen e djeshme, Ilir Daja i ka mbajtur të tijtë të fokusuar kryesisht te skemat ndërtuese dhe shkatërruese në kushte loje.
Duket qartë se trajneri i bardhekuqve është tërësisht i pakënaqur me atë çka ekipi ka treguar në ndeshjet e fundit dhe sidomos për sa i përket tranzicionit negativ. Për këtë arsye, për më shumë se 30 minuta e ka udhëzuar ekipin që të merret me mbulimin e duhur të zonave në kohë e hapësirë, për të krijuar më shumë stabilitet në këtë sektor të fushës.
U punua edhe me formacionin, e megjithatë jo deri në atë pikë sa të “fiksoheshin” titullarët. Dilemat janë ende të mëdha, por gjithsesi kjo e ka penguar teknikun 53-vjeçar që të testojë repartin e avancuar. Sulm i cili do të përbëhet prej treshes klasike: Bregu-Krasniqi-Gripshi.
Fieraku është rikuperuar plotësisht, ndaj mund të themi që ta nisë nga minuta e parë këtë javë. Korçarët mbeten në pritje të Bruno Ditës dhe Asion Dajës. Të dy futbollistët e kanë kaluar dëmtimin, por vendimi zyrtar për gatishmërinë e tyre do të merret prej stafit teknik sot ose nesër.
