Interi arriti të fitonte sfidën e javës së 12-të, 2-1 në shtëpi ndaj Veronës, por me sa shumë vuajtje.
Gjithçka nisi në malore për zikaltrit, teksa që në minutën e 19-të, miqtë shënuan me Verre nga pika e bardhë e penalltisë, pas faullit të shkaktuar brenda zone nga portieri Handanoviç.
Minutat e fraksionit të parë kalonin, por sulmi nuk po tundte dot rrjetën. Në pjesën e dytë, duhej një gol me kokë i Vesinos në minutën e 65-të, që të ndizte shpresat e ekipit të Kontes për një përmbysje.
Interi vijoi të sulmonte dhe të kërkonte golin e dytë, dhe këtë e realizoi Nikolo Barela, mesfushori që tregoi një perlë nga repertori i tij. Në minutën e 83-të, ai çoi peshë “San Siro”-n, duke goditur saktë me të djathtën nga jashtë zone, e duke i siguruar Interit fitoren.
Me këtë triumf, Interi merr për momentin vendin e parë, me 31 pikë, 2 më shumë se Juventusi që luan nesër në shtëpi ndaj Milanit.
