Evertoni ka mposhtur me rezultatin 3-1 Çelsin në shtëpi ditën e sotme, në ndeshjen e vlefshme për javën e 16 në Premier Ligë.
Ndeshja për ekipin e Lampard nisi e vështirë që në fillim, teksa Riçarlison shënoi në minutën e pestë për vendasit. Pas kësaj, “Blutë e Londrës” u hodhën në sulm, duke kërkuar golin e barazimit, por pa sukses. Pjesa e dytë nisi menjëherë me gol, teksa Klavert Levin shënoi golin e dytë për Evertonin, në minutën e 49’.
Pas tre minutash, Kovaçiç ngushtoi diferencën, duke shënuar golin e parë për Çelsin. Pas kësaj ekipi i Lampard u hodh tërësisht në sulm, për të gjetur golin e barazimit, por kur të gjithë prisnin golin e barazimit, shënoi Evertoni.
Në minutën e 84’, ishte përsëri Klavert Levin që shënoi golin e tretë duke i siguruar fitoren ekipit të tij. Pas kësaj ndeshje, Çelsi renditet në vendin e 4-t me 29 pikë, ndërsa Evertoni me këtë fitore renditet në vendin e 14 me 17 pikë.
