Gara e Çmimit të Madh të Gjermanisë është cilësuar si gara më e bukur sezonale e botërorit 2019 të Formula 1. Në faqen e saj zyrtare, Formula 1 organizoi një sondazh në lidhje me garën më të bukur. Me 23% të votave, gara e zhvilluar në pistën e Hockenheim është përzgjedhur nga fansat e këtij sporti si më spektakolarja e këtij viti.
Një garë që u zhvillua në kushte të vështira atmosferike, me shiun që ishte protagonist i saj. Gara u fitua nga Max Verstappen (Red Bull), që e nisi keq atë por arriti të rikuperojë. I dyti u rendit Sebastian Vettel (Ferrari) dhe i treti Daniil Kvyat (Toro Rosso).
Në vendin e dytë të garave më të bukura të këtij sezoni u rendit gara e Çmimit të Madh të Brazlit (13% të votave) dhe në vend të tretë, me nga 3% secila, garat e zhvilluara në Austri dhe Itali.
