Lajmi është tashmë zyrtar dhe Karles Alenja do të luajë si i huazuar tek Real Betis për pjesën e mbetur të sezonit. Mesfushori ishte i pakënaqur me minutazhin në “Camp Nou”, çka ka bërë që të zgjedhë një destinacion alternativ.
Për shërbimet e tij pati shfaqur interes edhe Milani me Paolo Maldinin, që i pati garantuar babait të futbollistit një kontratë huazimi 18-mujor, teksa në fund të këtij afati Alenja do të vishej përfundimisht kuqezi.
Drejtori milanist i bëri disa telefonata babait të lojtarit dhe për një moment palët ishin shumë pranë akordit, por në fund mesfushori refuzoi, pasi nuk kishte dëshirë të shkëputej nga Barcelona për më shumë se gjysmë sezoni.
