Inter “i çmendur”. Një pseudonim që duhet fshirë me çdo kusht. Kërkesë që Antonio Konte parashtroi që nga dita e parë që u zyrtarizua si trajner i Interit.
Dhe skuadra në këto muaj të parë e ka ndjekur. Në kampionat kanë pasur një vazhdimësi të mahnitshme: 42 pikë nga 51 të disponueshme (e njëjta kuotë me Juventusin), me vetëm 1 humbje dhe 3 barazime në bilanc.
Por në janar do të luhen sfidat “e vërteta” dhe për zikaltrit do shfaqet prova e forcës. Menjëherë pas pauzës, në fakt, Interi i dekadës së fundit ka vuajtur. Nga sezoni 2012-’13, zikaltrit janë rinisur vazhdimisht me frena duke hedhur poshtë thuajse gjithçka të arritur.
Rasti më emblematik është kampionati 2015-’16. Ai i Interit, me Mançinin në stol, ndodhej madje në krye. Pas rikthimit regjistroi edhe një fitore kundër Empolit. Më pas, errësirë… Një rendiment i ndjekur nga skuadra edhe gjatë sezoneve të fundit. Konte është i thirrur në detyrë për të ndryshuar një tjetër trend negativ zikaltër.