Kristiano Ronaldo mund ta mbyllë karrierën e tij të jashtëzakonshme te Juventusi. Vetë menaxheri i tij Horge Mendes tregon për “Sky Sport Italia” se 34-vjeçari është i lumtur në ambjentin bardhezi dhe përderisa ka firmosur kontratën për të qëndruar deri në vitin 2022, atëherë janë të gjitha gjasat që ai mund ta mbyllë kapitullin e tij si lojtar profesionist në Torino.
“Ai është i lumtur te Juventusi. Ata kanë një trajner të madh. Po, Ronaldo mund ta përfundojë karrierën te Juventusi. Ai ka nënshkruar kontratë”, zbulon të ardhmen e Ronaldos Mendes.
Portugezi ka fituar me bardhezinjtë 1 kampionat dhe 1 Superkupë të Italisë që kur u transferua në verën e 2018 nga Real Madridi. Përgjatë kësaj kohe, ai ka shënuar 39 gola në 62 takime me “Zonjën e Vjetër”. Ronaldo ëndërron që të fitojë Ligën e Kampioneve për herë të gjashtë në karrierë, por këtë herë me fanelën bardhezi. Juventus nuk ia ka dalë prej 23 vitesh të ngre lart trofeun e Ligës së Kampioneve.
