Drejtori sportiv i Ferrarit, Mattia Binotto, ka konfirmuar se një nga problemet e evidentuara te makina italiane gjatë vitit të fundit ka qenë ndalesa për ndërrimin e gomave. Jo të gjitha “pit stop” të Sebastian Vettel dhe Charles Leclerc kanë shkuar ashtu si duhet, me pilotët që kanë humbur sekonda të rëndësishme kur janë rikthyer në pistë.
“Ndalesat tona në bokse nuk kanë qenë shumë të mira. Në disa raste kemi ndaluar mbi 6 sekonda, çka nuk është e pranueshme për një makinë si Ferrari. Nëse duhet të fitosh garën apo titullin duhet të jesh i përkryer në të gjitha drejtimet. Nuk është çështje besimi, por duhet të stërvitemi më shumë. Ky është një ngërç që duhet ta përmirësojmë vitin tjetër”, tha Binotto.
