Anthony Joshua, kampioni i botës në peshën e rëndë, ka zgjedhur Tyson Fury si fitues të revanshit që britaniku do të zhvillojë më 22 shkurt ndaj amerikanit Deontay Wilder. Sipas Joshua, patrioti i tij i ka të gjitha mundësitë për ta fituar këtë revansh dhe sipas tij Fury shpesh nënvlerësohet për fuqinë e tij.
“Unë mendoj se Fury do ta fitojë këtë sfidë. Wilder e ka të qartë se ka vetëm një mënyrë për ta fituar duelin: Ta hedhë Fury “KO”, ta nxjerrë jashtë para raundit të 12-të. Ai nuk arriti ta bëjë këtë gjë herën e parë, ndaj dyshoj se do ta bëjë këtë herë”, u shpreh Joshua.
“Për sa i përket Fury, ai duhet ta godasë fort disa herë Wilder ose ta hedhë “KO” që ta fitojë duelin. Fury ka shumë arsenal brenda vetes, ndaj unë anoj në anën e tij në këtë përballje. Fury mund ta godasë fort Wilder edhe pse njerëzit e nënvlerësojnë shumë fuqinë e tij”, tha Joshua.
“Fury është një boksier shumë i mirë. Edhe Wilder është i jashtëzakonshëm, ka një të djathtë të fuqishme. Por nëse arrin ta eliminosh atë, mund të mposhtet. Unë i uroj suksese Fury, do të ishte e jashtëzakonshme të kishim një duel britanikësh për unifikimin e titujve kampionë”, tha Joshua.
