Liga e Kampioneve është trofeu që Juventusi e dëshiron prej shumë vitesh. Pavarësisht se blenë Kristiano Ronaldon në verën e vitit 2018, bardhezinjtë besojnë se kanë ende nevojë për përforcime të fuqishme në skuadër.
Media britanike “The Sun” raporton se “Zonja e Vjetër” ofron 178 milionë € për qendërmbrojtësin e Liverpulit Virxhil Van Dajk. Holandezi konsiderohet si njëri prej çelësave të duhur për t’i dhënë karakter kampioni skuadrës së Mauricio Sarrit në Europë.
Lidershipi, vendosmëria dhe vetbesimi janë cilësitë që Van Dajk i zotëron më së miri dhe fakti që po ndihmon Liverpulin në një tjetër sezon fantastik, i bën drejtuesit e Juventusit të besojnë se shtatlarti holandez do të japë kontribut vital për të marrë Ligën e Kampioneve pas mëse 20 vitesh.
Por, Van Dajk ndihet mëse i lumtur te Liverpuli dhe Juventusi duhet të paguajë dhe prishjen e klauzolës së holandezit. Kontrata e tij me “të kuqtë” skadon në vitin 2023.
