Sulmuesi i Manchester City-t, Raheem Sterling, do të mungojë për disa javë, pasi ka probleme me muskulin e tij. Lajmi është konfirmuar dhe nga trajneri Pep Guardiola. 25-vjeçari la fushën mes dhimbjesh në humbjen kundër Tottenhamit me rezultatin 2-0.
“Do të mungojë për disa javë, por nuk e di se sa gjatë. Është një problem për ne që u dëmtua ai, por kemi qenë dhe pa Gundogan dhe Laporten, nuk kemi se çfarë bëjmë”, tha Guardiola në lidhje me titullarin e tij.
Numri një i stolit ka folur dhe për sulmuesin e rikthyer nga dëmtimi i gjatë Leroy Sane. Gjermani stërvitet me grupin e lojtarëve. “Ai ka nisur stërvitje me ne dhe po merr ngarkesë. Ka nevojë për kohë për të fituar besimin. Ka nevojë për kohë, i duhen disa javë” – tha Guardiola.