Në profilin e tij në Instagram, ish-mesfushori brazilian ka publikuar një fotografi të vetes, ndërsa bënte aktivitet fizik. Një fizik i skalitur përmes muskulaturës mbresëlënëse. Një foto, e shoqëruar me një frazë motivuese: “Ditën kur mendoni se keni arritur potencialin tuaj të plotë, mos besoni, sepse mund të shkoni më tej! Përpara!”
Në fund të fundit, Zé Roberto luajti në nivele të larta deri në 43 vjeç, kur vendosi të “varë këpucët në gozhdë”, duke i thënë lamtumirë Palmeiras-it të tij. Pak para se të tërhiqej nga futbolli, ai iu përgjigj pyetjeve mbi sekretin e një fiziku të admirueshëm edhe në “pleqëri”:
“Nuk kam vese, unë nuk pi alkool. Nuk pi duhan, ha shumë mirë. Fle mirë dhe kam familjen time, që është besimi më i madh. Unë mendoj se këta janë faktorë të rëndësishëm, që më lejojnë të luaj në nivele të larta për moshën time”.
Dhe pothuajse katër vjet pas lamtumirës së tij nga futbolli, Zé Roberto me siguri nuk e ka braktisur stërvitjen. Tani ia kushton shumicën e kohës së tij “Bodybuilding”, pasi i gjithë trupi i tij duket si prej “graniti”. Kampioni europian me Real Madridin në vitin 1998, krenohet me një palmares të respektueshëm: një La Liga në ’97, një Superkupë Spanjolle, katër tituj Bundesligës, katër Kupa të Gjermanisë dhe katër Kupa të Ligës, të cilave iu shtohen edhe sukseset në shtëpi me Palmeiras (një kampionat dhe një kupë braziliane).
