Një situatë e pakëndshme u regjistrua ditën e sotme, teksa mesfushori i Partizanit, Romero, përfundoi në Komisariatin Nr.2 pas një debati me tone të ashpra mes tij dhe të dashurës.
24-vjeçari venezuelian, u shoqërua nga policia, ndërkohë që e dashura e tij, nuk ka pranuar të bëjë një kallzim në lidhje me këtë ngjarje, pasi bëhet fjalë vetëm për një përplasje verbale dhe jo dhunë fizike.
I ndodhur në kushte të vështira psikologjike, për shkak të karantinës dhe raportit aspak pozitiv që futbollisti ka pasur kohet e fundit me klubin e Partizanit si dhe vështirësive financiare të hasura ditët e fundit, venezueliani nuk është përmbajtur, duke ulëritur dhe duke dëbatuar me tone të ashpra me të dashurën e tij. Romero është shpallur “non” grata nga drejtuesit e kuq, prej disa muajsh, teksa që është degdisur te skuadra B, për shkak edhe të sjelljes kontraverse.
“Panorama Sport” mëson se mesfushori pritet të lirohet në orët në vazhdim, ndërsa e dashura e tij, do të jetë me urdhër mbrojtje për afro 10 ditë. Më pas ajo do të largohet nga Tirana drejt Italisë. Kujtojmë që Romero dhe e dashura jetojnë në të njëjtin apartament. Edhe pse në dukje i vështirë për t’u respektuar urdhri i mbrojtjes, mesfushori duhet të bëjë kujdes, pasi në rast shkelje të urdhrit të mbrojtes, rrezikon të përfundojë në burg.
