Ditën e diel do të zhvillohet gara e parë sezonale e botërorit 2020 në Formula 1 dhe Ferrari nuk pret ndonjë surprizë të madhe. Sipas drejtorit sportiv Mattia Binotto, në pistën e Zeltweg do të jetë po e njëjta makinë që ishte edhe në testet dimërore dhe Australi. Pra, një Ferrari jo shumë kompetitive.
“Rezultatet e atyre testeve na lanë të kuptojmë se ku kemi gabuar dhe drejtimin që duhet të kenë punimet e tanishme. Tani kemi një rrugëzgjidhje dhe besojmë se në garën e Hungarisë do të sjellim ndryshimet e para në makinën tonë. E dinim se ato ndryshime nuk do të ishin gati për garën e parë, ndaj pritëm garën e Hungarisë”, tha Binotto.
Pra, në Austri, në dy garat e para, nuk do të shohim një makinë Ferrari kompetitivë. “E dimë që për momentin nuk kemi një paketë të shpejtë, këtë gjë e dinim edhe në Australi. Kjo është një pistë ndryshe nga ajo e Australisë, me temperatura të tjera. Do të shfrytëzojmë këto dy gara për të kuptuar edhe më mirë situatën”, tha Binotto.
