Një kampionat i humbur në favor të Real Madrid. Një Champions League për t’u luajtur dhe shumë dyshime mbi atë që do të jetë trajneri i ardhshëm.
Në shtëpinë e Barcelona ka shumë pasiguri që janë konfirmuar nga fjalët e Arturo Vidal. Mesfushori i katalanasve ka folur për Win Sports TV edhe në lidhje me Quique Setien, e ardhmja e të cilit në drejtim të skuadrës nuk është aspak e sigurt.
“Njerëzit na kërkojnë të fitojmë çdo ndeshje dhe çdo kampionat, por është e vështirë. Këtë herë nuk ia kemi dalë. Por ky është futbolli dhe ka skuadra të forta si Real Madrid”, ka thënë Vidal për sezonin e La Liga-s.
Në lidhje me problemet që ka pasur Barcelona gjatë sezonit: “Ajo që ka thënë Messi është e vërtetë. Kemi pasur shumë probleme, kemi humbur pikë në mënyrë të pabesueshme, si në ndeshjen kundër Celta Vigo-s”.
“Tani duhet të bashkohemi. Tifozët duan tituj, por kur kjo nuk ndodh, shtypi fillon të flasë për ndryshimin e trajnerit, lojtarëve e kështu me radhë”.
“Me Setien nuk kemi pasur mundësi të punojmë shumë sepse ka marrë drejtimin e ekipit papritur. Klubi, në përfundim të sezonit, duhet të mendohet mirë për të ardhmen e Barcelona-s”.
