Disa fanella sporti, 35 palë atlete, një xhup sportiv dhe një lejehyrje në të gjitha mjediset e Lakers, ku nga pas ishte shkruar “Mamba”, pseudonimi i Kobe Bryant.
Ka qenë ky “thesari” që ka gjetur një çift në Los Anxhelos, pasi ka blerë në ankand një magazinë të braktisur në Kaliforni. Një magazinë-depozitë ku zakonisht mbahen sendet personale kur je jashtë shtëpisë.
Çifti nuk i ka besuar syve kur ka parë brenda magazinës gjithë këto sende personale të mbajtura nga ish-basketbollisti i Lakers, i ndarë nga jeta në janar të këtij viti, pas një aksidenti me helikpoter.
Të gjitha sendet e gjetura janë verifikuar dhe janë origjinale. Çuditërisht ato janë gjetur pikërisht më 23 gusht, në ditën e lindjes së Kobe Bryant.
