Fabio Cannavaro ka analizuar futbollin italian dhe në veçanti lajmet e fundit në lidhje me Juventus-in. Nga zgjedhja për t’ia besuar ekipin Andrea Pirlo-s te merkato e bardhezinjve, që janë në kërkim të një sulmuesi.
Në një intervistë të dhënë për Gazzetta dello Sport, trajneri aktual i Guangzhou Evergrande ka thënë:
“Pirlo ka qenë në vendin e duhur në momentin e duhur. Jam i lumtur për të, por nuk do të jetë e lehtë. Është folur për të si një i përzgjedhur nga fati, por Guardiola dhe Zidane kanë patur pak eksperiencë si trajnerë kur kanë filluar”.
“Sigurisht, idenë e futbollit e ka të qartë, por tani do të duhet të arrijë t’ia përcjellë lojtarëve dhe kjo nuk ndodh gjithmonë menjëherë. Pesimist? Jo, Andrea është një djalosh shumë i zgjuar”.
“Do të ketë nevojë për kohë. Tek Juventus nuk duhet të bëjnë të njëjtat gabime të bëra dhjetë vite më para me Ciro Ferrara-n, i cili nuk është ndihmuar”.
Në lidhje me merkaton: “CR7? Nëse ke një lojtar të tillë, më të mirin, duhet të mbështetesh tek ai. Por ai duhet të kuptojë se, edhe pse është i jashtëzakonshëm, është 35 vjeç”.
“CR7 duhet të pranojë se është më mirë për të luajë 40 ndeshje në maksimumin e formës se sa 50 jo dhe aq të mira”.
“Dzeko tek Juventus? Ai është i fortë, kjo nuk diskutohet. Por jam i bindur se Juventus do të bëjë zgjedhje të tjera. Nuk e kuptoj tendencën që të merren nga jashtë lojtarë në fund të karrierës. Nuk do të doja që kampionati të bëhej varreza e elefantëve”.
