Më në fund edhe Formula 1 do të ketë tifozët e saj. Organizatorët e garës së Mugello, që zhvillohet në Itali më 13 shtator, kanë vendosur që në tribunat të jenë të pranishëm gati 3 mijë tifozë.
Kjo do të jetë gara e parë e këtij sezoni në Formula 1 që hap dyert për fansat, teksa deri më tani çdo garë është zhvilluar pa spektatorë.
Organizatorët e garës së Mugello kanë bërë me dije se për garën nr.1000 të Ferrarit në Formula 1 do të nxjerrë në shitje 2000 bileta për fansat e këtij sporti, duke respektuar distancimin social dhe rregullat anti-Covid. Çmimi i këtyre biletave do të variojë nga 190 euro deri në 1200 euro.
Ndërsa rreth 1000 bileta do të jepen për abonentët e “Ferrari Club”, për të cilët është rezervuar një tribunë e posaçme.
