Kthesë e papritur në çështjen “Mesi”, që prej disa ditësh po mban të mbërthyer pas saj gjithë botën e futbollit. Tani shanset që Lionel Mesi të qëndrojë te Barcelona janë të mëdha, deri në 90%, sipas shtypit argjentinas që po ndjek hap pas hapi situatën.
“TyC Sports” bën me dije se sulmuesi, pas takimit pa rezultat mes babait-agjent Jorge dhe presidentit katalanas Bartomeu, ka ndërruar mendje dhe dëshiron të qëndrojë te Barcelona. Gazetari Martin Arevalo, i cili zbuloi “burofax”-in, me të cilin lojtari i kishte bërë të ditur Barcelonës dëshirën për të larguar, është shprehur: “Mesi po reflekton dhe po mendon seriozisht mundësinë e qëdnrimit edhe për një sezon për të mbyllur kontratën. Me 90%, do të qëndrojë”.
Sot mund të merret vendimi përfundimtar. Kontrata e “pleshtit” me katalanasit skadon më 30 qershor 2021. Babi i lojtarit është ende në Barcelonë dhe të tjera zhvillime nga kjo telenovelë priten orët e ardhshme. Mesi, gjithmonë sipas gazetarit argjentinas, tani anon nga qëndrimi, pasi drejtuesit e Barcelonës i kanë kërkuar të qëndrojë edhe një vit. Edhe emisioni ’90 minutos’ i “Fox Sports” ka folur për mundësinë e qëndrimit të Mesit, duke evidentuar faktin se takimi mes babit të tij dhe drejtuesve katalanas ishte miqësor.
