Pesë lojtarëve iu është ndalur të grumbullohen më Kombëtaren. Bëhet fjalë për Etrit Berishën, Lindon Selahin, Ylber Ramadanin, Florian Kamberin dhe Klaus Gjasulën.
Këta lojtarë nuk lejohen nga klubet e tyre për tu bashkuar me Kombëtaren kuqezi. Gjithashtu në dyshim janë edhe Vrioni me Strakoshën, me sulmuesin që nuk po e lejon Juventusi dhe portierin që dyshohet për një dëmtim.
Një lajm aspak i mirë ky për Edi Rejën dhe Shqipërinë, në prag të dy ndeshjeve të rëndësishme për Ligën e Kombeve, ndaj Kazakistanit më 11 tetor dhe ndaj Lituanisë më 14 tetor.
Klubet mbështeteten edhe te rregullorja e re e FIFA-s, ku në 90 ditët në vijim, klubet do të kenë mundësi të mos lejojnë lojtarët e tyre që të grumbullohen në kombëtaret përkatëse, pavarësisht nëse bëhet fjalë për ndeshje zyrtare apo miqësore.
Në argumentimin e kësaj vendimmarrje, krerët e FIFA-s shprehen se kjo është vetëm një masë e përkohshme e cila ndihmon në ruajtjen e shoqërisë dhe uljen e rreziqeve nga infektimi me Koronavirus.
Njoftimi i FSHF:
Lista e Kombëtares shqiptare për dy ndeshjet e Nations League ndaj Kazakistanit dhe Lituanisë do të pësojë sërish ndryshime për shkak të pandemisë COVID-19 dhe problemeve që janë hasur me klubet.
Etrit Berisha, Ylber Ramadani, Florian Kamberi, Lindon Selahi dhe Klaus Gjasula nuk do të jenë të gatshëm për dy ndeshjet e radhës, pasi nuk lejohen nga klubet të dalin jashtë vendeve respektive.
Ndërkaq, edhe Giacomo Vrioni nuk është lejuar për momentin për shkak të kufizimeve dhe nëse klubi i tij, Juventusi do t’i japë leje ai mund të bashkohet me kuqezinjtë të mërkurën mbrëma ose të enjten në mëngjes.
Edhe portieri Thomas Strakosha ka shfaqur probleme fizike dhe është në pikëpyetje për ndeshjet e tetorit. Për këtë arsye trajneri Reja ka vendosur të thërrasë portierët Alban Hoxha dhe Gentian Selmani.
Probleme fizike ka shfaqur edhe mbrojtësi Jon Mersinaj, i cili është duke u monitoruar nga stafi mjekësor vazhdimisht.
