Herald Marku është një nga pikat kryesore të Vllaznisë së trajnerit Brdariç, i cili gjithnjë sa vjen e rritet në lojën e tij. 24-vjeçari në një prononcim të shkurtër të dhënë për “Panorama Sport” pas fitores me Bylisin pohon se fitorja pati shumë rëndësi për shkodranët. Ai flet edhe për gjuajtjen e tij të fortë, që u ndal nga trau i portës mike.
“Ishte shumë e rëndësishme që arritëm që të kthehemi te fitorja në këtë takim. Ishin tri pikë shumë të rëndësishme për ekipin tonë. Mendoj se kjo ishte një fitore e merituar, pasi kishim mundësi që të kishim edhe një rezultat më të mirë edhe në këtë takim. Gjithmonë kur godas e mendoj se topi do të përfundojë në rrjetë. Një gjë të tillë e mendova edhe në atë moment. Topi,pasi shkoi shumë pranë kalit të vijës fatale, ishte diçka shumë e bukur për mua, por edhe për ekipin. Megjithatë, rëndësi kishte që arritëm që ta gjenim golin. Po kalojmë një moment të mirë dhe duhet që të vijojmë kështu”, u shpreh fillimisht Marku.
Në mesjavë Vllaznia luan ndaj Kastriotit dhe Marku vjen me statusin e ish-it në këtë sfidë. Në lidhje me duelin me krutanët, që nuk njohin humbje deri tani Marku u shpreh: “Kastriotin e njoh mirë, pasi kam qenë pjesë e kësaj skuadre. Kam respekt për punën që bëhet aty. Është një ekip që po tregon më të mirën në këtë start të kampionatit. Për ne është një përballje e vështirë, pasi është një kundërshtarë që luan mirë futboll. Megjithatë, ne do të udhëtojmë që të marrim më të mirën në këtë takim”.
