Java e 22-të e Kategorisë Superiore do të zhvillohet e gjitha ditën e mërkurë. Kryesfida e kësaj ndalese është Teuta-Vllaznia, një përballje direkte e dy pretendentëve për titullin kampion. Durrsakët e shikojnë veten 4 pikë më pak se kuqeblutë duke hapur akoma më shumë garën për titull.
“Beteja” e tretë sezonale mes “djemve të detit” dhe shkodranëve do të luhet në “Niko Dovana”, ora 16:00.
Kukësi luan një tjetër sfidë me rëndësi. Skuadra e Mirel Josës përballet me Laçin pretendent për titullin në orën 16:00
Tri sfidat e tjera luhen në orën 13:00. Tirana, e cila mori një fitore me peshë ndaj Vllaznisë, pret në shtëpi Bylisin. Bardheblutë dhanë sinjale se do të luftojnë deri në fund për të kapur zonën e Europës. Pavarësisht pozicioneve, sfida me ballshiotët pritet të jetë e ashpër, pasi Bylisi synon mbijetesën në Superiore.
Partizani udhëton në fushën e Apolonisë. Edhe pse të kuqtë nisen favoritë për fitore, fierakët arritën t’u merrnin “demave” një pikë në përballjen e fundit mes tyre.
Skënderbeu pret në shtëpi Kastriotin. Korçarët ndodhen në moment tepër kritik dhe duhet të sigurojnë mjaft pikë në vazhdimësi për të shpëtuar sezonin.
JAVA E 22-TË E KATEGORISË SUPERIORE
TIRANA-BYLIS (ora 13:00)
APOLONIA-PARTIZANI (ora 13:00)
SKËNDERBEU-KASTRIOTI (ora 13:00)
TEUTA-VLLAZNIA (ora 16:00)
KUKËSI-LAÇI (ora 16:00)
