Koreja e Veriut deklaroi se nuk do të marrë pjesë në Lojërat Olimpike “Tokio 2020”, eventi që zhvillohet këtë verë në Japoni, për shkak të pandemisë Covid-19. Ky vendim u mor nga qeveria koreano-veriore dhe Komiteti Olimpik i këtij vendi për të mbrojtur sportistët nga infektimi me virusin vdekjeprurës.
Edhe pse Pyongyang deklaron se në këtë vend nuk ka asnjë rast aktiv me koronavirus, në Korenë e Veriut kanë frikë. Për pasojë, Koreja e Veriut bëhet vendi i parë në botë që vendos të mos marrë pjesë në Olimpiadë për shkak të pandemisë. Në këtë vend masat anti-Covid janë shumë të ashpra, duke ndaluar lëvizjen e njerëzve.
Kjo është hera e parë që ky vend nuk merr pjesë në Lojërat Olimpike që prej vitit 1988. Asokohe Koreja e Veriut nuk mori pjesë në Olimpiadën që zhvillohej në Seul, të Koresë së Jugut.
