UEFA ka pezulluar me 10 ndeshje futbollistin çek të Slavia Pragës, Ondrej Kudela, pasi u vërtetua se ka përdorur tone racizmi në dëm të lojtarit të Rejnxhërsit, Glen Kamara.
Episodi ndodhi muajin e kaluar në sfidën për 1/16 e Ligës së Europës në ndeshjes midis Slavia Pragës-Rejnxhërs, ku qendërmbrojtësi çek u përfshi në një konflikt të madh me kundërshtarin e tij, Kamara, gjë e cila solli dhe përleshje fizike të dy futbollistëve në tunelin e stadiumit.
Vendimi i UEFA-s është marrë ditën e sotme, dhe kështu mbrojtësi 34 vjeçar do të humbasë dhe ndeshjet me Çekinë në Kampionatin Europian, pasi vendimi vlen për të gjitha kompeticionet. Ndërkohë UEFA ka dënuar me tre ndeshje pezullim dhe Kamaran, pasi ky i fundit e sulmoi Kudelan në tunelin e dhomave të zhveshjes duke nisur një përleshje fizike.
Racizmi është bërë një problem i theksuar në futboll, me UEFA-n e cila herë pas herë përpiqet të marrë masa për të ndaluar këtë fenomen të ulët.
