Kombëtarja e meshkujve në volejboll ka humbur sot në mbrëmje 3-0 ndaj Rumanisë në ndeshjen e parë eliminatore të Europianit 2021. Kuqezinjtë e drejtuar nga trajneri Jani Melka janë mundur në ndeshjen e luajtur në Sllovaki, ku po luhen takimet e Grupit E eliminator, ku bën pjesë edhe Shqipëria (rivalët janë Rumania, Sllovakia e Zvicra).
Një ndeshje e dominuar nga volejbollistët rumunë, që i fituan setet me shifrat 25-15, 25-19, 25-18. Rumunët krijonin një epërsi të lehtë dhe e administronin avantazhin deri në fund. Shqipëria, që luan me mungesa në këtë turne, bëri maksimumin e saj në fushë, duke rivalizuar deri diku, por pa mundur të fitojë dot ndonjë set.
Në takimin tjetër të këtij grupi, Sllovakia fitoi 3-0 ndaj Zvicrës. Nesër, Shqipëria do të luajë ndeshjen e saj të dytë, ndaj Zvicrës.
Faza e parë, Sllovaki 6-8 maj
6 maj, Rumani – Shqipëri, 3-0
7 maj, Zvicër – Shqipëri, 17:30
8 maj, Shqipëri – Sllovaki, 20:30
Faza e dytë, Rumani 14-16 maj
14 maj, Shqipëri – Rumani, 17:00
15 maj, Shqipëri – Sllovaki, 20:00
16 maj, Zvicër – Shqipëri, 20:00
