Fjalët e Bastian Schweinsteiger pas autogolit të Mats Hummels, në premierën e Gjermanisë ndaj Francës (1-0) nuk duket se janë pritur mirë nga qendërmbrojtësi i Borussia Dortmund. Ish-lojtari i Bayern Munich, i cili fitoi Kupën e Botës së bashku me Hummels më 2014, e përshkroi përpjekjen e ish-shokut të tij të skuadrës për të spastruar zonën, por e dërgoi topin në rrjetën e vet, si “të ngathët”. Në fakt, ai autogol i dha tri pikët skuadrës së Deschamps.
Vetë Hummels iu përgjigj shpejt Schweinsteiger, aktualisht analist sportiv në ZDF. Në një intervistë që dha për të përditshmen “Bild”, qendërmbrojtësi nënvizoi: “Unë mendoj se Basti (Schweinsteiger), si një ish-futbollist që është, duhet të jetë në gjendje të vlerësojë më mirë vështirësinë e largimit të atij topi. Natyrisht, është i lirë të shprehë mendimin e tij si analist që është”.
Përveç kësaj, veteran i “Mannschaft” zbuloi një anekdotë më kurioze në lidhje me djalin e tij 3-vjeç: “Për fat të mirë, ai ende nuk e di se çfarë është autogoli. Ai mendon: Një top që përfundon në rrjetë është gjithmonë mirë. Më kanë thënë nga familja se festoi autogolin tim. Do të më duhet t’ia mësoj disa gjëra të tjera akoma”.
