Jurgen Bardhi duket se do të jetë largimi i radhës nga skuadra e Partizanit. Pas largimeve të emrave të rëndësishëm si Eraldo Çinari, Jasir Asani, Eno Bitri, Esin Hakaj e Ferhan Hasani, edhe mesfushori 23-vjeçar është drejt “divorcit” me të kuqtë.
Disa javë më parë, Bardhi nuk pranoi të rinovojë me Partizanin pa iu plotësuar kushtet e tij dhe drejtuesit, bashkë me lojtarin, gjetën një dakordësi momentale…
AKORDI – Dakordësia mes klubit dhe lojtarit ishte që të qëndronte edhe për Kupat e Europës, por në rast se i vjen një ofertë nga jashtë Shqipërisë deri më 31 gusht, do të ishte i lirë të largohej falas. Dhe ofertat nuk kanë munguar për Bardhin…
Klubi turk i Bolusporit ka shfaqur interes për 23-vjeçarin dhe vetë Bardhi është pro transferimit në Turqi.
Te Boluspori, luan edhe portieri shqiptar Gentian Selmani, si dhe pak ditë më parë u transferua shqiptari tjetër Dejvi Bregu.
Bardhi ka dhe një ofertë nga Kroacia, por bisedimet me klubin turk kanë qenë pozitive dhe Bardhi shumë shpejt pritet të largohet nga Partizani.
