Endri Çekiçi po bëhet gati që të kthehet përsëri të luajë në Superligën turke në sezonin e ri. Mesfushori i përfaqësueses shqiptare ka mbyllur gjithçka me Ankaragyçy, pasi do të transferohet te Koniaspor në elitën e kampionatit turk.
Koniaspor kërkon mesfushorin ofensiv shqiptar për ta bërë pjesë të manovrës, pasi paraqitjet e tij në elitë me Angaragyçy i kanë bindur drejtuesit e klubit se ai është një futbollist i cili vlen për Superligën. Palët kanë marrëveshje për të firmosur një kontratë 2+1, ndërsa nuk është bërë ende e ditur se cila është shuma që do të paguajë Koniaspor për kartonin e tij.
Gjithsesi, edhe akordi mes klubeve duket se është arritur, pasi Çekiçi dje është larguar nga grumbullimi i skuadrës së Ankaragyçy. Ai pritet tashmë të kalojë testet mjekësore dhe të prezantohet në klubin e tij të ri, ku do të luajë përkrah Sokol Çikalleshit.
