Topi ka pushuar së rrotulluari, të paktën prej disa ditësh në kampionatet më të rëndësishme të Europës. Pas përfundimit të Europianit dhe Kupës së Amerikës, disa futbollistë kanë marrë pushimet, ndërsa drejtuesit po mendojnë për të bërë merkaton. Është një tjetër sesion merkatoje në kohë pandemie dhe nuk pritet që të ketë blerje të jashtëzakonshme.
Sigurisht që disa skuadra kanë ruajtur milionat e tyre për këtë ditë, ndërsa të tjera do të sajohen me kosto zero. Me shumë mundësi “ligjin” në këtë hapësirë transferimesh do ta bëjnë ato me zero euro.
Për të parë bombat milionere, ndoshta duhet të presim vitin e ardhshëm. Efektet e pandemisë vazhdojnë të jenë ende prezente dhe gjithçka pritet të rregullohet me fillimin e sezonit të ri, kur do të rikthehen edhe tifozët në shkallët e stadiumeve. Është viti i dytë që po bëhet merkato vere në krizë ekonomike.
SHKËLQEN PARISI – Luksi në kryeqytetin francez nuk është vetëm në “Elize”. PSG-ja vazhdon të bëjë ligjin në këtë merkato duke transferuar disa nga lojtarët më të rëndësishëm në qarkullim. Sigurisht që moda e operimit ka ndryshuar dhe tani janë në modë futbollistët pa kontratë. Sigurisht që rrogat e këtyre lojtarëve që u transferuan janë të larta dhe kurioze, por kjo gjë del në plan të dytë. Me kosto zero janë transferuar Serxho Ramos, Xhixho Donaruma dhe Vajnaldum.
“Të dalësh nga zona e komfortit është diçka e mirë. Kam ardhur në vendin e duhur për të fituar trofe”, ka thënë ish-lojtari i Realit. Gjithashtu, edhe Donaruma e konsideroi një projekt ambicioz për të fituar. Në Paris janë duke i dhënë formë një skuadre të frikshme, në të cilën vazhdojnë të jenë Mbape, Nejmar, Verrati dhe shumë të tjerë. Pa harruar që këtë verë u ble edhe Ashraf Hakimi për 60 milionë euro nga skuadra e Interit, pa harruar bonuset.
BEFASON LAJPCIGU – E besoni apo jo? Lajpcigu është skuadra që ka shpenzuar më shumë miliona në merkato deri tani. Ekipi gjerman në fakt ka një bilanc spektakolar mes shitjeve dhe blerjeve. Në këtë skuadër u transferuan Andre Silva (23 milionë), Gvardiol (18.8 milionë), Angelinjo (18 milionë), Simakan (15 milionë), Henriks (15 milionë), Klark (1.82 milionë). Nga shitjet kanë arkëtuar 92 milionë euro të shpërndara në këtë mënyrë: Upamekano 42.5 milionë, Konate 40 milionë dhe Uolf 9.5 milionë. Bilanc i shkëlqyer.
MERKATO QENDRE – Skuadrat e mëdha janë në kërkim të qendërmbrojtësve sepse kështu duan të ngrenë murin për të fituar. Siti e futi këtë trend me Dias, Stons, Laport dhe shumë të tjerë. Bajerni transferoi Upamekanon, Liverpuli mori Konatenë, PSG-ja Serxho Ramosin dhe Reali i Madridit Alabanë. Merkato lëviz nga qendra dhe një lojtar që mund të ishte i lirë është Kielini. Mirëpo, ai dje zyrtarizoi lajmin që do të firmosë me Juventusin.
MARSEJA – “Na pëlqen që të ndërtojmë një stil fitues, me një lojë që do të përcjellë pasionin e tifozëve”. Kështu tha spanjolli Pablo Longoria kur u bë president i Olimpikut të Marsejës në shkurt. Në fillim transferoi Horge Sampaolin dhe këtë verë ka bërë revolucion në organikë. Gerson u transferua për 25 milionë, Balerdi për 11, Peres 4,5, Konrad 3, Ynder, Saliba, Paul Lopez janë huazuar. Të gjithë bashkë kanë kushtuar 44 milionë euro. Por u larguan gjithashtu Sakai, Tovë, Maksim Lopez.
BREXIT DHE PREMIER – Kampionati anglez vazhdon të mos ketë rivalë në merkato. Në vitin 2020, në mesin e pandemisë kaluan për herë të pestë radhazi barrierën e 1 miliard eurove. Ekzaktësisht arritën 1.5 miliardë euro. Kampionatet e mëdha shpenzuan të gjitha së bashku 1.6 miliard euro.
Kontratat e majme për të drejtat televizive deri në vitin 2025 kanë bërë që skuadrat të bëjnë blerje të frikshme. “Premier Liga ka marrë më pak goditje nga COVID-i. Vetëm një euro nga 8 që përfitojnë skuadrat angleze vjen në ditën e ndeshjes. Kjo do të thotë avantazh në bërjen e ekonomisë së klubit”, ka thënë Kieran Meguajër, profesor ekonomike.
KOSTO ZERO – Futbollistë si Aguero, Erik Garsia, Depaj, Ramos, Vajnaldum, Alaba, Çalhanoglu, Donaruma janë larguar si të lirë. Një praktikë që u pëlqen shumë drejtuesve të skuadrave. “Nuk ka likuiditet dhe futbollistët presin që të mos varen nga transferimet. Duan që të fitojnë më shumë dhe për këtë arsye e bëjnë.
Për më tepër, shumë skuadra kanë kontrata shumë të gjata me 3-4 vite dhe për këtë arsye lojtarët duan të provojnë aventura të reja”, tregon Marselino Elana, drejtor i një kompanie marketingu në Spanjë. Gjithashtu, shton se lojtarët e lirë dhe huazimet do të jenë lëvizjet më të shumta. COVID-i vazhdon të kushtëzojë gjithçka.
MERKATO
SHPENZIMET
Lajpcig 91.62 mln
Man. Junajtid 85 mln
PSG 76 mln
Lestër 50 mln
Milan 50 mln
Marsejë 44 mln
Bajern 42.5 mln
Shahtjor 41 mln
Liverpul 40 mln
Noruiç 39.6 mln
MË TË SHTRENJTËT
Sançho 85 mln
Hakimi 60 mln
Upamekano 42.5 mln
Konate 40 mln
Buendia 38.4 mln
De Pol 35 mln
Daka 30 mln
Tomori 29.2 mln
Gerson 25 mln
Andre Silva 23 mln
TRANSFERIMET E LIRA
Serxho Ramos
Xhorxhinjo Vajnaldum
Xhixho Donaruma
Serxho Aguero
Erik Garsia
Memfis Depaj
David Alaba
Markos Paulo
Hakan Çalhanoglu
Zhoao Mario
PESË KAMPIONATET
Premier Liga 380 mln
Serie A 251.6 mln
Bundesliga 221.7 mln
Ligue 1 185 mln
La Liga 116.5 mln
