Mesfushori i Kombëtares, Endri Çekiçi u bë protagonist absolut me golin e realizuar në fitoren 2-1 të Koniasporit ndaj rivalëve të Bashaksheirit. Pogradecari realizoi një supergol në pjesën e dytë të takimit duke barazuar shifrat në 1-1 pas golit të pësuar në fundin e pjesës së parë.
Pas ndeshjes, Çekiçi foli për kanalin e klubit duke u shprehur:
‘’Ne e përgatitëm ndeshjen gjatë gjithë javës, dhe e pamë që nga minuta e parë që do të luftonim. Kishim kontrollin e lojës, ata nuk kishin asnjë shans. Humbëm përqendrimin për 1 minutë dhe pësuam golin në fund të pjesës së parë, por kur shkuam në dhomat e zhveshjes ne biseduam me njëri tjetrin dhe u shprehëm se do ta përmbysim rezultatin.
Nga dita e parë që erdha, të gjithë më kanë pritur shumë ngrohtë. Për mua ka qenë e thjeshtë të përshtatem. Mendoj se fuqia jonë është grupi, të gjithë luftojnë për njëri-tjetrin. Askush nuk keqkuptohet dhe të gjithë e dinë se çfarë duhet të bëjnë.
Ne i premtojmë tifozëve, jo në emrin tim por në të gjithë lojtarëve që do të luftojnë në çdo ndeshje dhe do të japim 100% nga vetja çka është shumë e rëndësishme’’.
