Kampionati në Arabinë Saudite këtë vit do të ketë emra të njohur për publikun shqiptar dhe që në javën e parë, ka pasur përballje mes tyre. Ish-mesfushori i përfaqësueses shqiptare, Besnik Hasi, drejton prej tre vitesh atje dhe në këtë sezon është ulur në stolin e Al Ahli. Por tani, nuk është më vetëm.
Gjatë verës, në kampionatin e Arabisë Saudite është zhvendosur një tjetër emër shumë i njohur, Paolo Tramexani, i cili për katër vite ishte krahu i djathtë i Xhani De Biazit në përfaqësuesen shqiptare. Ai ka marrë drejtimin e Al Faisal në Arabinë Saudite dhe pas Ezgjan Alioskit, kohët e fundit ka kthyer sytë edhe nga Superiorja, duke synuar të afrojë Alban Hoxhën në radhët e klubit të tij.
tramexani
Të dy trajnerët në vitet e kaluara i ka bashkuar fakti se janë përmendur vazhdimisht si kandidatë për stolin e përfaqësueses shqiptare, por bisedimet dhe ofertat nuk u konkretizuan asnjëherë për një arsye apo një tjetër. Këtë herë i bashkoi edhe një objektiv tjetër, ai i kampionatit ku marrin pjesë, pasi Hasi dhe Tramexani kanë matur forcat me njëri-tjetrin pasi java e parë e kampionatit vendosi Al Ahli përballë Al Faisal.
Rezultati? Një barazim 1-1 që i lë të dy përgjysmë të kënaqur, pasi këtë vit kanë ambicie për të luftuar me ekipet e kreut e sidomos edhe këtë duel interesant me ngjyra kuqezi, pasi nuk është çudi që në të ardhmen këto dy emra të kthehen përsëri në tavolinat e drejtuesve të FSHF-së.
