Federata Ndërkombëtare e Çiklizmit (UCI) ka bërë me dije se gjatë muajit të fundit ka bërë të mundur largimin nga Afganistani të 165 sportistëve, kryesisht çiklistë. Shumë prej tyre janë femra (mbi 100), që merreshin me këtë sport dhe promovonin rolin e femrës në Afganistan.
Lajmin e konfirmoi Adam Lappartient, që tha se ky mision është kryer në bashkëpunim me skuadrën izraelite të çiklizmit Israel Start-Up Nation, Federatën Aziatike të Çiklizmit dhe FIFA-n. Shumica e refugjatëve janë dërguar në Zvicër, Shqipëri, Kanada, Francë, Izrael dhe Amerikë.
“38 çikliste femra i kemi sjellë në qendrën e refugjatëve afganë në Zvicër, ku edhe po trajnohen. Për ne është e rëndësihme të ndihmojmë anëtarët e familjes tonë, që vuajnë nga kjo situatë. Kishim një plan që funksionoi mirë dhe falënderoj shtetet që i kanë mirëpritur këta sportistë refugjatë”, tha Lappartient.
