Pak javë më parë, Josh Cavallo është bërë futbollisti i parë që ka deklaruar se është homoseksual.
Deklarata e tij ka marrë një mbështetje të madhe, sepse kjo temë është akoma tabu në botën e futbollit dhe diskriminimi ndaj homoseksualëve është një plagë në zona të ndryshme të botës.
Në lidhje me këtë gjë, lojtari italo-australian, në një intervistë të dhënë për The Guardian, ka rrëfyer se nuk është i sigurt për pjesëmarrjen në Kupën e Botës Katar 2022.
“Kam lexuar se në Katar ka dënim me vdekje për homoseksualët. Është diçka nga e cila kam shumë frikë dhe nuk kam dëshirë të shkoj”, ka thënë 21-vjeçari.
“Kjo gjë më trishton, sepse Botërori është një nga ngjarjet më të mëdha për një futbollist profesionist. Luhet për vendin tënd, por më frikëson fakti që do të zhvillohet në një vend që vë në rrezik jetën tonë”.