Berat Gjimshiti do të jetë një nga mungesat e mëdha të përfaqësueses shqiptare të futbollit për ndeshjet e nëntorit ndaj Anglisë dhe Andorrës. Lojtari është kthyer në stërvitje me një fashaturë mbrojtëse dhe ka filluar të aktivizohet me klubin, siç ndodh në mesjavë në Ligën e Kampioneve.
Trajneri Reja me sa duket ka vendosur që të mos e rrezikojë lojtarin, i cili edhe sot ishte në stol në ndeshjen e kampionatit të Atalantës. Pikërisht para fillimit të ndeshjes me Kaljarin, trajneri i bergamaskëve, Xhiampiero Gasperini, ka folur për mbrojtësin shqiptar dhe situatën e tij.
“Kemi rikuperuar Pesinën dhe Gjimshitin, të cilët janë në pankinë, por janë ende në rrezik. Gjimshiti ka luajtur një pjesë loje, por pas pushimit për kombëtaret do të jemi në rregull”, tha tekniku italian.
