Ivan Balliu po përjeton padyshim një sezon të paharrueshëm në karrierën e tij. Mbrojtësi i përfaqësueses shqiptare nënshkroi në verë me Rajo Vajekanon, për të pasur mundësi që të luante në elitën e futbollit spanjoll. Por padyshim futbollisti as nuk e imagjinonte që në këtë vit të tijin të parë, ai dhe ekipi i cili lufton për mbijetesë, ta shihnin veten në luftën për një vend në Europë.
Suksesi 1-0 ndaj Espanjol të Keidi Bares në fundjavë ka bërë që Rajo të jetë aktualisht në vendin e 6 në klasifikimin e La Liga, duke kaluar edhe një superfuqi si Barcelona. Një sukses i jashtëzakonshëm të cilin as tifozët më të zjarrtë nuk do ta ksihin menduar dhe që vetë Balliu e ka cilësuar si ëndërr në një postim në rrjetet sociale.
“Nëse është një ëndërr, nuk dua që të zgjohem! Ekip i madh! Të vazhdojmë?”, ishin fjalët e mbrojtësit shqiptar në rrjetet sociale për mbështetësit e Rajo Vajekano i cili po kalon vitin më të mirë në historinë e vet në La Liga.
Si esto es un sueño, no quiero despertar! Enorme equipo!! Seguimos? @RayoVallecano pic.twitter.com/hrkuMG2Pyf
— Ivan Balliu Campeny (@ivan_balliu) December 5, 2021