Është një moment kyç për lëvizjen e futbollit italian. Pas fitores së kombëtares axurre në “EURO 2020”, të gjithë sytë duket se janë kthyer nga Italia dhe skuadrat e Serie A, pavarësisht lamtumirës së fundit të disa prej lojtarëve më përfaqësues të botës së futbollit.
Një nga temat kryesore të debatit është padyshim ajo e reformës, temë e diskutuar disa herë nga drejtuesit federalë, madje edhe publikisht gjatë takimeve të ndryshme. Duke folur për mikrofonat e “Corriere dello Sport”, presidenti i FIGC-së, Gabriele Gravina, hapi mundësinë e një rinovimi në formatin e Serie A. Një risi që synon t’i ofrojë kampionatit një atraktivitet më të madh:
“Është koha për të provuar play off-et në Serie A. Në vitet 90-të askush nuk besonte te tri pikët për fitore, por në vend të kësaj funksionoi. Play off-et në Lega Pro dhe Serie B janë një garanci e shikueshmërisë dhe suksesit. Do të ishte gabim që të mos e testojmë edhe në Serie A”.
Një mënyrë, me pak fjalë, për të parandaluar që aktet finale të kampionatit të kthehen në një sërë garash mes skuadrave që tashmë kanë arritur objektivat e tyre sezonale: “Ne kemi nevojë për një reformë që redukton ekipet dhe ndryshon formatin, ku do të fitonte cilësia dhe konkurrenca”.
Për sa i përket shijes, Gravina u shpreh edhe për vendimin e Lorenzo Insigne për t’u larguar nga Italia dhe transferuar në Kanada: “Ndjeva një zhgënjim të madh. E pashë të rritej në Pescara në treshen e çudirave me Verrattin dhe Immobile. Ky largim na trishton. Fola me të, nuk e ka të lehtë largimin, por ndonjëherë në zgjedhjet e tij të jetës proza mbizotëron mbi poezinë”.
Insigne është i lidhur edhe me diskursin kombëtar, i angazhuar në play off-et kualifikuese të Kupës së Botës në Katar: “Ka pak skepticizëm, por ne triumfojmë duke qenë bashkë. Lëndimi i Chiesa më shqetëson, më erdhi keq. Është sikur fati të na kërkonte llogari për suksesin tonë në Kampionatin Evropian.
Nëse Mancini gaboi? Ka një skuadër të fortë, nuk mendoj se liga ka dhënë shumë alternativa. Nëse qëndron apo largohet nga Italia? Ne do ta vlerësojmë së bashku me të, por rruga me Mancinin nuk lidhet me një rezultat të vetëm. Ai ka rregulluar imazhin e kombëtares”.
